Komo parti di selebrashon di 40 aña, Fundashon Kas Popular kier a dediká su mes e aña aki na duna mas tantu informashon posibel na komunidat.
Ya nos a presentá 8 programa di 26 minüt ku a ser transmití na vários planta di televishon.
Den kada un produkshon a trata temanan interesante i importante pa nos klientenan
pero tambe pa henter komunidat por ta na altura di tur lokual tin di aber ku FKP.
Den e programa aki por mira nos koleganan: Yuraisca, Suzy, Elrick, Ludviendie y tambe Sr. Con, duna informashon i splika tokante diferente asuntu ku tin di aber ku e relashon entre hürdó i doño di kas
FKP su meta prinsipal ta pa proveé bibienda pa henter komunidat pero prinsipalmente pa esnan ku ta den mas nesesidat di un kas.
Den 40 aña FKP a konstruí mas di 5000 kas tantu di hür komo pa benta.
Nos meta ta pa sigui buska formanan i medionan kon pa sigui konstruí mas bibienda asina kumpli ku e demanda grandi ku tin ainda pa kas.
Konstruí kas ta un aspekto, pero atendé i manehá bibienda ta un otro asuntu ku FKP tin di aber kun’e tur dia.
Den maneho di bibienda ta bin aserka leinan i reglanan ku tin ku yuda pa un bon komprenshon di kiko e hürdó i e doño di kas tin ku atené nan mes na dje.
Aspektonan manera pago di hür, komportashon den kas i den bario i tambe aspektonan di mantenshon.
Tur esakinan por tende den e programa aki di òktober ku nos a produsí ku hopi dedikashon pa boso por haña mas informashon.
E programa aki lo keda transmití na:
TV Dirèkt kanal 13 : dia 31 di òktober 12’or di mèrdia
I na:
TeleCuraçao: dia 3 di novèmber pa 7’or di anochi
