Den e programa di e luna aki lo dediká atenshon na formanan alternativo ku FKP ta apliká pa konstruí proyektonan di kas. Analisando e nesesidat grandi pa kas, e kosto di konstrukshon i limitashon di fondo pa por kumpli ku deseo di esnan sperando un kas, FKP a kuminsá apliká sistemanan mas moderno i ekonómiko pa konstruí kas.
Ku e sistema aki no solamente e kosto ta mas abou pero tambe e periodo di konstrukshon ta mas kòrtiku. Den e próksimo programa ekspertonan di FKP lo duna’bo splikashon dje proseso di konstrukshon.
Den mesun programa aki FKP lo splika kon ta tene kuenta ku e infrastruktura ku mester pa krea un zona bibabel tantu pa esnan ku ya ta biba den e bario kombiná ku e kasnan nobo.
FKP ke krea barionan bibabel for di e fase di diseño, tumando na kuenta tur faseta ku ta nesesario pa hasi bibamentu den un bario agradabel pa e habitantenan.
Despues ku un proyekto ta kla, mester habitá e kasnan, i ta konosí ku personanan ku a keda selekshoná pa habitá e kasnan di Sapaté lo mester a pasa un periodo di preparashon, kaminda konvivensia tabata tema sentral.
Algun miembro di personal di FKP lo splika resultado di e evaluashon ku a hasi ku e habitantenan i tambe kon ta bai kontinuá i kiko por spera pa proyektonan nobo.
