Durante 9 luna lo bishita 3500 kas di Gobièrnu i FKP pa determiná estado físiko dje kasnan pa despues presentá un plan di mantenshon di mas aña.

Ya pa algun aña, FKP pa falta di fondo, no por a kumpli ku mantenshon optimal di tur e kasnan di Gobièrnu, konsekuentemente tin un retraso den e trabounan di mantenshon.

Ku aprobashon di Gobièrnu, FKP a disidí, di lansa un magno proyekto, kaminda den 9 luna di tempu lo bishita aproksimadamente 3500 kas pa investigá i dokumentá e estado físiko dje kasnan.

Pa e proyekto aki FKP a entrená 18 kontroladó, tur hóbennan ku un preparashon tékniko, p’asina nan por bishitá e kasnan. Nan lo papia ku e habitante, registrá tur kos riba un tablet, i tambe saka portrèt di loke a konstatá . Asina por tin un informashon konkreto i korekto di e estado dje kas.

Despues ku inventarisá tur loke tin na informashon, lo entrega un plan di mantenshon na Gobièrnu, pa por risibí e finansa nesesario pa por drecha e kasnan.

Produkshon Filmiko

Fundashon Kas Popular a produsí un filmashon di kon tantu e preparashon komo ehekushon dje proyekto “ Conditiemeting “ ta tuma lugá. Durante e produkshon lo por tende sosten inkondishonal pa e proyekto di tantu Minister di SOAW Sr. Hensley Koeiman i Minister di VVRP. Sra. Zita Jesus Leito.

Minister Hensley Koeiman den e produkshon “Conditiemeting”, ta bisa“ Meten is Weten. 
Esta, midi pa bo sa ! Esaki ta eksaktamente lo kual FKP ta bai hasi durante dje próksimo 9 lunanan.

Mas aleu direktor i funshonarionan di FKP Sres. Arthur Con, Ludviendi Eleonora i Jairo Scharbaai ta duna un splikashon ekstenso di e proyekto den su totalidat.

Fundashon ta pidi komunidat pa koperá ku e proyekto aki i duna e kontroladornan espasio pa nan por hasi nan trabou.