Mantenshon di Kas
Mantenshon di kas ta algu importante i meskos ku bo, FKP ke pone atenshon na esaki tambe.
Nos ke drecha loke ku daña o kibra na un kas di forma profeshonal i responsabel.
Pero tin okashon kaminda abo komo hürdó di kas, mes ta responsabel pa e mantenshon o reparashon.
Vários bia nos ta haña e pregunta ken ta responsabel pa kiko? Esei nos kier splika bo aki.
Por lo general nos por bisa ku FKP ta mantené e partinan konstruktivo di e kas manera muraya, dak etc.
Reparashonnan chikitu parti paden di e kas ta kai pa kuenta di e hürdó. Esei ta konta tambe pa dañonan kousá pa mal uso i trato brutu o maltrato.
Tratamentu di keho urgente.
Naturalmente FKP ta purba di atendé bo keho mas pronto posibel. Den kuantu tempu nos por trata bo keho ta dependé sinembargo di e tipo di trabou.
Tin sierto keho ku ta urgente, por ehèmpel un pipa di awa ku ta basha awa, problema ku koriente, esakinan nos ta drecha mes ora.
Tur otro keho ku no tin karakter di urgensia, nos ta purba pa drecha mas pronto posibel.
Niun hende na kas
Si nos empleadonan di departamento di mantenshon no haña bo na kas, bo ta haña un karchi den bo buzon di pòst, ku ta bisa ku nan a pasa i pa por fabor yama nos departamento di mantenshon pa traha un otro sita.
Foyeto ABC di Mantenshon
Promé ku yama FKP pa kualke reparashon, konsultá promé ku bo ABC di Mantenshon. Den e foyeto nos a deskribí presis ken ta responsabel pa kiko.
Pero prevení ta mihó ku lamentá!
Pues trata bo kas bon, kuid’é komo si fuera ta bo propiedat. Si algu kibra òf daña na bo kas, ku ta kai bou di bo responsabilidat anto bo no por drech’é, FKP por drech’é p’abo kontra pago.
Pa entregá keho òf pa mas informashon, por yama tur dia entre:
9'or pa 11'or di mainta na telefòn. 4326000.
Tambe por manda un Whatsapp na +5999 432 6000
Pa keho urgente manera:
- Kortsluiting
- Pipa di awa ku a kibra
- Riolering verstop
Por tuma kontakto ku nos dor di klik riba e boton aki i yena e formulario i mande.
Nos lo tuma kontakto ku bo tan pronto posibel.