FKP ta konstuyendo 204 apartamento na Tera Cora di forma rapido i inovativo

Mester bisa ku Fundashon Kas Popular ta konstruyendo e edifisinan aki den un tempu rèkòrt.
Na mei 2022, FKP a risibí e pèrmit pa konstrukshon di e promé 72 apartamentonan, na Dezèmbèr 2022 a hasi “Groundbreaking”, na Ougústus último a yega na e punta di mas haltu di e promé edifisio i na 16 di Novèmber ya ta yega na e punta di mas haltu di e siguiente edifisio di 12 apartamento pa SOAW.

E konstrukshon aki ta sosodé di e forma inovativo di “gietbouw” (betòn bashá) kual sistema ta demostrá di duna bon resultado den e kuadro di e rapides i e kalidat di konstrukshon.
E kontratista pa e parti “ruwbouw” ta RSC BV. Por konta ku sigur 50 persona lo tin trabou direkto den e konstrukshon pa e próksimo 3 añanan durante e konstrukshon di e proyekto kompleto, sin konta e kantidat di personanan ku lo tin trabou via di, sub-kontratista, “leveranciers”, transporte, kompania di utilidat, etc. pa e próksimo 3 añanan.

 Nos kier gradisí SOAW ku mirando e nesesidat grandi pa bibienda a komprometé nan mes pa duna un man dor di finansiá 36 di e apartamentonan. Tambe nos kier gradisi VVRP pa e permitnan necesario i nan guía den kreashon di e infrastruktura pa e bario.

No por keda sin menshoná i gradisí e inbolbimentu di 10th EDF (10th European Development Fund) kende a finansiá e infrastruktura kompleto di e area kaminda lo konstruí e kompleho di 204 apartamento.

Den e promé fase lo konstuí  72 apartamento kual ta konsistí di 6 edifisio di 3 piso, kaminda kada edifisio lo kontené 12 apartamento.  Di e edifisionan aki tres (3) ta finansiá dor di SOAW, di kua dos (2) edifisio ta apartamentonan di 2 kamber i un (1) edifisio di apartamentonan di 3 kamber. Pa un total di 36 apartamento. FKP ta karga ku kosto di e otro 3 apartamentonan. E proyekto total ta kalkulá na un 10 mion florin.

E bibiendanan aki ta destiná pa hür, i meskos ku ta konta pa e otro komplehonan, pa yega na remarke e kliente mester a pasa den un proseso di kurso i preparashon intensivo di 3 luna. Meta prinsipal di e kursonan aki ta pa formá i eduká e habitantenan i yudanan pe krea un mihó kombibensia den e kompleho di 3 piso. Den futuro lo por tin e posibilidat ku FKP ta bin ku apartamentonan pa benta tambe.

Proyekto Tera Kòrá ta den full swing..