FKP - Mi Kas Awor
Bogotá/Barranquilla, 30 di òktober 2025 – E mishon ofisial di e Ministerio di Desaroyo Sosial, Labor i Bienestar (SOAW) i Fundashon Kas Popular (FKP) pa Colombia a konfirmá sin duda e kredibilidat internashonal, rentabilidat ekonómiko i relevansia sosial di e programa Mi Kas Awor.
Durante e bishita, a establesé ku Mi Kas Awor no ta solamente un programa di konstrukshon di bibienda, sino un mekanismo di desaroyo ekonómiko i sosial struktural ku direktamente i duradero ta benefisiá pueblo di Kòrsou.
Di supsidio pa kresementu struktural
Di akuerdo ku e análisisnan ekonómiko presentá pa dr. Luis Felipe Henao, èks Minister di Bibienda di Colombia, kada florin invertí den Mi Kas Awor ta krea un efekto multiplikadó di entre 1,5 i 8 florin.
E rendimentu aki ta wòrdu generá a traves di empleo, produkshon doméstiko, stimulashon di konsumo, i rendimentu fiskal pa gobièrnu.
Mi Kas Awor ta transformá asina e konsepto di “supsidio” den un siklo ekonómiko di reinvershon i kresementu produktivo.
E kombinashon di konstrukshon di bibienda, labor i edukashon ta forma un sistema ku ta reforsá su mes ku strukturalmente ta kontribuí na Kòrsou su GDP, stabilidat fiskal, i koheshon sosial.
“Tur kas konstruí ta representá un kadena di aktividat ekonómiko, di kontratista pa suministradó, di mekániko pa bendedó.
Mi Kas Awor ta pone den moveshon un siklo nashonal di trabou, orguyo, i forsa di kompra,” segun Arthur Con, direktor di Fundashon Kas Popular.
Polítika sosial ku impakto ku por wòrdu midi
Huntu ku ekonomista Roberto Angulo, fundador di e Índise di Pobresa Multidimensional (MPI), a konfirmá e metodologia ku ta permití Kòrsou midi, manehá i demostrá e impakto di Mi Kas Awor.
Esaki ta proveé FKP i gobièrnu ku un hèrmènt ku no solamente ta proveé bibienda, pero tambe adelanto sientífikamente verifikabel den kalidat di bida:
mehorá akseso na empleo, edukashon, servisio públiko i outosufisiensia finansiero.
Ku esaki Mi Kas Awor ta e promé maneho den historia di Kòrsou pa definí, kalkulá, i kombatí pobresa a base di dato.
E sosten sosial, inkluyendo entrenamentu den komportashon finansiero, desaroyo di komunidat i responsabilidat di bibienda, ta sigurá ku famianan ta krese di forma sostenibel, no solamente pa ku propiedat, pero tambe pa loke ta trata perspektivanan.
Trabou komo fundeshi di dignidat
Den kolaborashon ku Servicio Nacional de Aprendizaje (SENA), outoridat nashonal di entrenamentu di Colombia, a pone e fundeshi struktural pa un sistema di entrenamentu dualístiko na Kòrsou.
Esaki ta hasi posibel pa entrená i sertifiká sientos di empleado lokal pa trabounan ku ta bini direktamente for di Mi Kas Awor, manera: konstrukshon, mantenshon, teknologia di instalashon, energia i maneho.
E aserkamentu aki ta sigurá ku kada florin invertí no ta djis move blòki, pero ta yuda hende bai dilanti.
E ministerio di SOAW di e manera aki a pone e fundeshi pa e fluho di empleo mas ekstenso i sostenibel den historia moderno di Kòrsou, no temporal, pero struktural, no supsidiá, pero gana.
“Trabou ta e seguridat sosial nobo,” Minister Charetti America-Francisca a deklará.
“Mi Kas Awor no ta djis un proyekto di bibienda, e ta un instrumento nashonal ku ta elevá famianan, restorá komunidatnan i priorisá e dignidat di trabou.”
Rekonosementu institushonal i konfirmashon internashonal
Durante reunionnan ku Senado di Colombia, CAFAM, i CAMACOL, e delegashon a sigui fortalesé e kuadro institushonal pa koperashon.
Presidente di Senado Lidio García Turbai a anunsiá ku Parlamento Kolombiano lo adoptá un resolushon pa establesé formalmente kooperashon bilateral entre Colombia y Kòrsou den e áreanan di bibienda, empleo i polítika sosial.
CAFAM, e institushon di bibienda sosial lider na Colombia, a pone su modelo di konosementu kompleto disponibel pa FKP, inkluyendo hèrmèntnan digital, sosten di famia, i strukturanan di monitoreo, kualnan ta permití Kòrsou pa subi su kapasidat di implementashon.
E rekonosementunan aki ta pone Kòrsou dilanti den inovashon sosial den Latino-Amérikano, ku Mi Kas Awor komo un ehèmpel di un maneho ku ta funshoná efisiente, transparente i dirigí riba hende.
Barranquilla ta konfirmá: Konstrukshon di bibienda sosial ta un lógika ekonómiko
E alkalde di Barranquilla, Alejandro Char, a yama bon biní na e delegashon di Kòrsou den e siudat ku a pone e norma Latino Amerikano pa maneho di bibienda lokal.
Ora ku e programa nashonal “Mi Casa Ya” a stòp di eksistí, Barranquilla a disidí di no warda riba sosten di ariba. E siudat a kopia e modelo eksakto i a lansa “Mi Techo Propio”, finansiá kompletamente pa rekursonan di munisipio.
“No podíamos darle la espalda al programa. Teníamos que crear uno igualito, sin inventarnos nada,” Char a deklará, refiriendo na e desishon di Barranquilla pa konstruí independientemente riba e konsepto eksitoso.
E resultadonan ta papia pa nan mes: kaminda e siudat a invertí 400 bion peso den supsidio, mas ku 3 trion peso a wòrdu generá den benta di kas i aktividat ekonómiko.
“Barranquilla pone un peso, y la venta de vivienda trae diez veces más,” segun e alkalde.
E rendimentu ei, esta 1 peso di invershon públiko = 10 peso di balor ekonómiko, ta konfirmá e esensia di Mi Kas Awor. Ku un maneho sosial, basta ku e ta bon diseñá, no ta un pòst di gastu sino un multiplikadó nashonal.
Char a ilustrá esaki ku un historia personal: un trahadó doméstiko ku ántes mester a biaha tres ora pa bai traha tur dia, pero awor ta bibando den su mes kas, ta dies sinku minüt leu for di su lugá di trabou, danki na e supsidio di Barranquillia.
“Díganme si esto no es un milagro de vida,” Char a bisa.
“Una maravilla, ese es el resultado de las políticas de vivienda.”
FKP ta konsiderá esaki komo un prueba bibu di loke Mi Kas Awor por logra na Kòrsou: un maneho ku no solamente ta konstruí kas, pero tambe mehorá bida, fasilitá trabou i restorá dignidat humano.
E oumento di empleo ku ta resultá for di e programa ta kontribuí tambe na un redukshon di kriminalidat. Esaki na su turno ta fortalesé e sektor di turismo i posishoná Kòrsou komo un destinashon mas seif i atraktivo pa bishitante i invershonistanan.
E mishon humilde di progreso
Na nòmber di Fundashon Kas Popular, Arthur Con a enfatisá ku e éksito aki no ta sali for di ambishon polítiko, sino for di e konvikshon ku kapital humano ta e úniko fuente duradero di prosperidat.
“FKP ta konsiderá Mi Kas Awor komo un prueba ku Kòrsou ta kapas pa implementá maneho ku ta moralmente korekto, ekonómikamente i sosialmente hustu.
Bou di liderazgo di Minister America-Francisca, sosten sosial ta transformando den un realidat produktivo.
Ku humildat, nos ta rekonosé ku Kòrsou a drenta un fase nobo di desaroyo, den kua maneho ta empoderá hende mas ku yudansa nunka por a hasi.”
Un kontrato sosial nobo pa Kòrsou
Ku su rendimentunan konfirmá, empleo i redukshon di pobresa ku por wòrdu midi, Mi Kas Awor a desaroyá su mes den un kontrato sosial nashonal: un akuerdo entre e gobièrnu, sosiedat i futuro.
E programa ta primintí no solamente bibienda, pero stabilidat;
no solamente trabou, pero konfiansa den bo mes;
no solamente kresementu ekonómiko, pero hustisia sosial.
Ku Mi Kas Awor, Kòrsou ta na inisio di un era den kua kada famia tin un parti den e progreso di pais, un progreso ku ta wòrdu konstruí, bibá i eksperensiá dor di e pueblo mes.
Na nòmber di Fundashon Kas Popular (FKP)
Arthur Con, Direktor