Kòrsou ta habri un kapítulo nobo den su historia di bibienda: di lista di espera pa kas propio, konstrukshon duradero i oportunidat di trabou.
Koperashon ku Colombia ta avansá den tres área stratégiko: sertifikashon internashonal EDGE Advanced, preparashon finansiero i sosial di famianan, i formashon di trahadónan lokal.
Koperashon ku Colombia ta avansá den tres área stratégiko: sertifikashon internashonal EDGE Advanced, preparashon finansiero i sosial di famianan, i formashon di trahadónan lokal.
WILLEMSTAD, 18 di novèmber 2026 – Durante mas di 47 aña, Kòrsou tin e reto di proveé sufisiente bibienda pa su poblashon. E eksperensia di e último dékadanan ta mustra ku, sin un kambio struktural den e modelo tradishonal di bibienda, e listanan di espera lo sigui krese.
Ku e programa Mi Kas Awor, Gabinete Pisas III ta impulsá un modelo ku ta pone kas propio (eigenwoningbezit) sentral. Pa medio di e “woningverwervingsbijdrage”, un aporte finansiero pa atkisishon di kas, famianan ku ta kalifiká por haña mas oportunidat pa bira doño di nan propio kas.
E delegashonnan di Kòrsou ku a bishitá Colombia durante òktober 2025, i e partisipashon di Fundashon Kas Popular (FKP), a habri kaminda pa tres trayekto di koperashon ku institushonnan kolombiano.
1. CAMACOL – Rumbo pa sertifikashon EDGE Advanced den tur konstrukshon di Mi Kas Awor
E delegashon tékniko di FKP i CAMACOL a yega na un entendimentu pa prepará un Memorandum of Understanding (MOU), ku e meta di introdusí e normanan internashonal di EDGE den tur proyekto di konstrukshon di Mi Kas Awor, ku e ambishon di logra sertifikashon EDGE Advanced.
E proseso lo kuminsá ku entrega di e mapanan di konstrukshon i pinturanan tékniko di kada proyekto pa evaluashon segun e normanan di EDGE. Durante konstrukshon, lo verifiká si e kontratistanan ta kumpli ku e diseñonan i spesifikashonnan aprobá. Ora e kasnan ta kla, un verifikashon final independiente mester konfirmá ku e proyektonan ta kumpli ku e eksigensianan pa risibí e sertifikashon.
Kiko EDGE Advanced ta nifiká?
EDGE Advanced ta un nivel avansá di sertifikashon internashonal pa edifisionan duradero, desaroyá pa International Finance Corporation (IFC), parti di Grupo Banco Mundial.
Pa un proyekto kalifiká, e mester demonstrá un redukshon mínimo di 40% den energia, 20% den awa i 20% den energia inkorporá den materialnan di konstrukshon, kompará ku un edifisio di referensia.Pa famianan di Kòrsou, esaki por nifiká kasnan ku ta konsumí ménos elektrisidat i awa, kuentanan mensual mas abou i ménos impakto riba medio ambiente.
Esaki ta nifiká ku Mi Kas Awor no solamente ta aspirá na kasnan pagabel pa kumpra, sino tambe kasnan mas ekonómiko pa biba aden durante hopi aña.
E sertifikashon lo keda otorgá solamente despues ku un proseso di evaluashon i verifikashon independiente a konfirmá ku e proyekto ta kumplí ku e normanan eksigí.
2. ASOCAJAS i COMPENSAR – Prepará famianan pa bira doño di nan kas
E delegashon di FKP, huntu ku e ekiponan tékniko i hurídiko di ASOCAJAS i COMPENSAR, a konkluí ku tin base pa prepará un MOU pa desaroyá tres instrumento den Mi Kas Awor:
–Modelo di sparmentu: yuda famianan spar sistemátikamente i fortalesé nan disiplina finansiero.
–Evaluashon sosial: konosé mihó e situashon di kada famia i identifiká unda tin nesesidat di sosten.
–Evaluashon finansiero preliminar: prepará aplikantenan promé ku nan drenta e fase di fiansa serka bankonan, sin remplasá e evaluashon ni e desishon final di e banko.
E eksperensia di COMPENSAR ta kombiná sparmentu, supsidio, fiansa i bienestar finansiero. E meta ta pa famianan no solamente haña akseso na un kas, sino tambe ta prepará pa paga i mantené nan kas propio di manera sostenibel.
3. SENA – Formashon, sertifikashon i rekonosementu ofisial di trahadónan lokal
Durante e reunionnan ku SENA, ku partisipashon di Leonora Barragán Bedoya, Direktora di Formashon Profeshonal Integral, Andrés Quiroz Mesa i Juan Pablo Parra, a diskutí e posibilidatnan di koperashon tékniko ku Fundashon Kas Popular (FKP).
Segun e informashon di e delegashon, Direktor Fray Ricardo Torres Castro a duna instrukshon na su ekipo pa sigui prepará un akuerdo di koperashon ku FKP, basá riba e kuater áreanan stratégiko identifiká, ku un trayekto adishonal pa rekonosementu ofisial di e sertifikadonan:
–Formashon di instruktornan lokal: ekspertonan di SENA pa prepará leermeesters di Kòrsou, ku despues por sigui forma otro trahadónan. E meta ta pa transferí konosementu i desaroyá kapasidat di formashon permanente den nos propio pais.
–Evaluashon di 551 (source CBS) persona desempleá den sektor di konstrukshon: identifiká nan eksperensia, motivashon i kompentensianan, pa despues ofresé formashon i sertifikashon kaminda ta aplikabel. E profeshonnan ku mester risibí prioridat lo keda determiná segun e nesesidatnan di sektor di konstrukshon na Kòrsou.
–Formashon di hóbennan: prepará hóbennan di Kòrsou pa profeshonnan den sektor di konstrukshon, ku énfasis riba konosementu tékniko, eksperensia práktiko i oportunidatnan di desaroyo profeshonal.
–Diagnóstiko di man di obra: determiná den kua profeshonnan tin falta di personal kapas, kua spesialisashonnan por wòrdu desaroyá lokalmente i unda por resultá nesesario atraé temporalmente trahadónan spesialisá for di eksterior.
–Rekonosementu ofisial di sertifikadonan di SENA na Kòrsou: inisiá un proseso ku Ministerio di Enseñansa, Siensia, Kultura i Deporte (OWCS) pa evaluá e programanan, nivelnan di formashon i sertifikadonan di SENA, ku e meta di logra rekonosementu ofisial di e kualifikashonnan profeshonal na Kòrsou.
E proseso lo mester konsiderá e kontenido di e programanan, kantidat di ora di formashon, nivel di kompetensia, eksigensianan tékniko i evaluashonnan práktiko. E outoridatnan kompetente na Kòrsou lo determiná e nivel di kualifikashon i e forma di rekonosementu ku por wòrdu otorgá.
E koperashon aki lo mester keda elaborá den un akuerdo formal entre e partidonan, inkluyendo e kondishonnan operashonal i finansiero. E rekonosementu di sertifikadonan lo dependé di e evaluashon i desishon di e outoridatnan kompetente na Kòrsou.
E prinsipio ta pa invertí promé den preparashon di nos propio hendenan, sertifiká nan kompetensianan, logra rekonosementu ofisial di nan kualifikashonnan i fortalesé e kapasidat laboral di Kòrsou.
Di lista di espera pa kas propio: un modelo nobo pa Kòrsou
E tres trayektonan ta komplementá otro.
CAMACOL ta habri kaminda pa konstrukshon mas duradero i efisiente. ASOCAJAS i COMPENSAR ta kontribuí ku eksperensia den preparashon sosial i finansiero di famianan. SENA ta ofresé oportunidat pa fortalesé formashon tékniko i kapasidat laboral lokal.
Ainda niun MOU no a wòrdu firmá. E entendimentunan alkansá durante e reunionnan ta forma e base pa e ekiponan tékniko i hurídiko prepará e akuerdonan formal i definí nan implementashon.
Mi Kas Awor ta persiguí un modelo kaminda invershon den bibienda por generá mas ku kas: oportunidat di trabou, konosementu lokal, famianan mas prepará i desaroyo ekonómiko duradero.
Di lista di espera pa kas propio. Di desempleo pa formashon i trabou. Di konstrukshon tradishonal pa bibienda duradero.Fundashon Kas Popular (FKP)