Kòrsou ta konstruí brùg ku Colombia
Minister di Desaroyo Sosial, Labor i Bienestar, Sra. Charetti America-Francisca, a yega awe Bogotá, Colombia, pa un bishita di trabou ofisial di 19 pa 30 di òktober 2025. E delegashon, konsistí di representantenan di e ministerio di SOAW i Fundashon Kas Popular (FKP), tin komo meta pa fortalesé koperashon ku institutonan kolombiano i órganonan gubernamental di Colombia ku ta lidernan den e áreanan di konstrukshon di bibienda sosial, edukashon profeshonal i kombatimentu di pobresa.
Durante e bishita di trabou ta planiá reunionnan ku Luis Felipe Henao, eks Minister di Vivienda i representante di Lambda, Roberto Angulo, ekonomista i eksperto riba e Índise di Pobresa Multidimenshonal (MPI) i ku representantenan di SENA, instituto nashonal di formashon di Colombia. E kombersashonnan aki ta dirigí riba desaroyo di trayektonan dualístiko di siña i traha (leerwerktrajecten) pa e sektor di konstrukshon, ku ta kontribuí na traspaso di konosementu i fortifikashon di abilidatnan profeshonal dentro di e programanan di konstrukshon di bibienda na Kòrsou.
Un parti importante di e programa ta e enkuentro ku e Presidente di Senado, Sr. Lidio García Turbai i e Presidente di Kámara di Representantenan, Sr. Julián David López Tenorio. Durante e kombersashonnan aki lo para ketu riba e envolvimentu parlamentario den e programa nashonal Mi Casa Ya i e kuadronan legislativo ku a permití su implementashon eksitoso, esta bistanan ku ta di gran balor pa e desaroyo mas aleu di Kòrsou su propio programa Mi Kas Awor.
Banda di esei e delegashon lo bishitá tambe CAFAM, un institushon spesialisá den programanan di bibienda sosial i supsidio i CAMACOL, e federashon di konstrukshon di Colombia dirigí pa èks Minister Guillermo Herrera.
E bishita di trabou lo konkluí na Barranquilla, kaminda interkambionan lo tuma lugá ku Subalcaldesa Ana María Aljure riba planifikashon urbano, pèrmitnan i e posibilidat pa establesé múltiple rutanan aéreo direkto entre Barranquilla i Kòrsou, den kordinashon ku Minister Cooper i Minister Middelhof.
Ku e bishita di trabou aki, Kòrsou ta fortalesé su relashonnan internashonal i ta tuma e siguiente paso den ehekushon di e programa Mi Kas Awor, dirigí riba progreso sosial, bibienda pagabel i kresementu ekonómiko duradero.