Mi Kas Awor ta reuni ku sektornan klave pa prepará siguiente fase di bibienda na Kòrsou
WILLEMSTAD, 16 di novèmber 2026 – Durante siman pasá, Fundashon Kas Popular (FKP) i e ekipo di ekspertonan di Mi Kas Awor a sostené reunionnan stratégiko ku bankonan, institushonnan di kuido pa personanan di edat, kontratistanan grandi i ekspertonan di infrastruktura. E meta ta prepará e kondishonnan finansiero, sosial, tékniko i infrastruktural pa siguiente fase di e programa.
Ku mas ku 16.000 famia registrá, Mi Kas Awor ta trahando pa konektá finansiamentu di kas propio, kapasidat di konstrukshon, infrastruktura i nesesidatnan sosial den un programa sostenibel di largu plaso.
Diálogo ku sektor bankario
Riba 12 di novèmber, FKP a reuni ku Curaçao Bankers Association i bankonan afiliá pa presentá e modelo finansiero di Mi Kas Awor i papia tokante e papel di sektor bankario den finansiamentu hipotekario.
E partidonan tin intenshon di sigui ku un seshon tékniko tokante pago durante e diferente fasenan di konstrukshon, kontrol di progreso i responsabilidatnan di kada parti. E diálogo ta preparatorio i no ta adelantá riba aprobashon di hipotek ni kompromiso finansiero.
Bibienda i kuido pa personanan di edat
FKP a dialogá tambe ku representantenan di kasnan di kuido grandi pa eksplorá posibilidatnan pa desaroyá bibienda adaptá pa personanan di edat, ku aksesibilidat i kuido integrá segun nan nesesidat.
E meta ta investigá kon personanan di edat por mantené nan independensia i dignidat den komunidatnan sigur. E konsepto ainda ta den fase di eksplorá.
Preparashon ku sektor di konstrukshon
FKP i Mi Kas Awor a reuní ku representantenan di MNO Vervat, Dusron, Jansen de Jong Groep i RCS pa evaluá kapasidat di konstrukshon, personal, material, logístika i infrastruktura nesesario pa un programa di largu plaso.
E reunionnan no ta representá kompromiso di kontrato. Kualke futuro partisipashon mester kumplí ku e proseduranan legal i reglanan di kompetensia aplikabel.
Wèpsait nobo di Mi Kas Awor
FKP a lansá tambe e wèpsait renobá www.mikasawor.com, disponibel na Papiamentu, Hulandes i Spañó.
E wèpsait ta brinda informashon tokante e modelo, e proyekto piloto, lokalidatnan, dokumentonan nesesario i e proseso di evaluashon. Famianan interesá por drenta e portal di inskripshon, miéntras hürdónan di FKP tin akseso separá na nan servisionan digital.
Servisionan públiko konektá digitalmente
E portal FKP–Mi Kas Awor ta fasilitá verifikashon di dato i aksesonan digital via sinku instansia públiko importante: SVB, Inspekshon di Impuesto, Kranshi, Kadaster i SOAW.
–SVB (Sociale Verzekeringsbank): via un konekshon API ku ya ta operashonal di test, FKP por verifiká datonan relevante di aplikantenan direktamente ku SVB, pa fasilitá e proseso di validashon di nan dosier.
–Inspekshon di Impuesto: ku outorisashon di e aplikante, FKP por verifiká e informashon di entrada direktamente.
–Kranshi: famianan por pidi e ekstrakto spesífiko pa Mi Kas Awor online.
–Kadaster: aplikantenan tin akseso na e kanal digital pa pidi e deklarashon ku ta komprobá si nan tin bien inmóbil registrá.
–SOAW: personanan ku ta risibí sosten sosial por pidi nan deklarashon digitalmente.
E adelantonan aki ta representá un paso importante den modernisashon di servisionan públiko na Kòrsou. Nan ta redusí biahe, fila i trámite, ta fortalesé e proseso di verifikashon i ta permití ku famianan por hasi gran parti di nan inskripshon for di kas, via kòmpiuter òf telefòn.
FKP ta ekspresá su profundo gradisimentu na direktornan, hefenan di servisio i tur e ámtenarnan di SVB, Inspekshon di Impuesto, Kranshi, Kadaster i SOAW, ku nan koperashon i kompromiso a kontribuí pa hasi e adelanto históriko aki posibel pa pueblo di Kòrsou.
Infrastruktura i planifikashon pa largu plaso
FKP i Mi Kas Awor a profundisá tambe e diálogo ku Koert van Buiren di Economisch Bureau Amsterdam tokante e invershonnan di infrastruktura nesesario pa desaroyo di bibienda.
E siguiente paso ta identifiká e nesesidatnan pa kada lokalidat i prepará un matris tékniko- finansiero ku por aportá na e Agènda Nashonal di Invershon pa e próksimo 10 te 15 aña.
Eksperensia lokal i internashonal
E preparashonnan ta forma parti di mas ku tres aña di trabou ku ekspertonan lokal i internashonal, entre nan Luis Felipe Henao Cardona, eks minister di Bibienda di Colombia i un di e ekspertonan ku a kontribuí na e modelo di Mi Kas Awor.
Henao a ser asigná resientemente komo gerente di Fondo Milagro na Colombia, ku responsabilidat pa liderá e rekonstrukshon di regionnan afektá pa e temblor di 10 di ougùstùs 2026.
E reunionnan i preparashonnan aki no ta adelantá desishonnan ni aprobashonnan pendiente. Nan ta yuda FKP fortalesé e base tékniko i institushonal pa un programa ku ta buska pa fasilitá akseso na kas propio i kontribuí na komunidatnan sigur, aksesibel i duradero.
Fundashon Kas Popular (FKP)