Mi Kas Awor un Reforma struktural di Kòrsou su maneho di bibienda públiko

Fundashon Kas Popular (FKP), den kolaborashon ku Ministerio di Tráfiko, Transporte i Planifikashon Urbano (VVRP), a presentá awe e Dokumento di Desishon Final di Mi Kas Awor na gobièrnu di Kòrsou. E dokumento aki ta forma e base pa e reforma struktural di maneho di bibienda públiko i e introdukshon formal di Mi Kas Awor komo programa nashonal di bibienda.

Finansieramente irefutabel

E sifranan no ta laga espasio pa duda:

* Invershon públiko total: XCG 471 mion;

* Entradanan struktural: XCG 838 mion (impuesto riba propiedat, ‘erfpacht’ i benta di kasnan eksistente);

* Resultado neto: +XCG 454 mion riba 60 aña òf un promedio di +XCG 7.6 mion pa aña.

E programa ta prueba ku e no ta un pòst di gastu, sino un invershon ku ta paga su mes bèk i strukturalmente ta fortifiká finansa di gobièrnu.
 

Sosialmente transformativo

Mi Kas Awor ta mas ku djis konstrukshon di bibienda:

  • 31.761 trabou nobo den 15 aña;
  • Mas o ménos 5.000 hende lo subi riba e liña di pobresa, loke ta representá un redukshon di 10-15%;
  • Kasnan pagabel pa tur kategoria di entrada, inkluso esnan mas vulnerabel;
  • Supsidio di kompra ku ta ofresé famianan propiedat, stabilidat i kreashon di aktivo.

Di e manera aki, e programa ta kibra e sirkulo visioso di supsidio di hür ku ta perpetuá dependensia i ta pone un rumbo pa independensia i oumento di balor pa Famianan di Kòrsou.

Polítikamente stratégiko i internashonalmente ankrá

E programa ta sigui modelonan komprobá internashonalmente, inkluyendo esunnan di Mi Casa Ya di Colombia y Ciudad Dominicano Juan Bosch. Tur dos programa a demostrá di yuda sientos di míles di famianan i a proba ku ta doño di un kas ta e yabi pa stabilidat sosial i kresementu ekonómiko. Kòrsou ta skohe asina un trayekto probá i eksitoso, adaptá na realidatnan lokal.

Urgente i ireversibel

E krísis di bibienda no por wanta posposishon. Preshon di turismo i hürmentu di término kòrtiku a eroshoná e stòk di bibienda pagabel drástikamente, menasando di desplasá míles di famia. Kada luna di retraso ta nifiká mas skarsedat, preisnan mas haltu i tenshonnan sosial.

Mi Kas Awor ta ofresé e úniko kontesta realístiko, posibel i sostenibel. E programa ta marka un kambio di kurso nashonal:

  • di dependensia pa independensia;
  • for di gastunan pasivo pa invershonnan produktivo;
  • for di refugio temporal te na kreashon di aktivo permanente.

Mensahe di Klousura

Ku ratifikashon di Mi Kas Awor, Kòrsou ta pone e fundeshi pa un sosiedat sosialmente hustu, ekonómikamente resiliente, i polítikamente stabil. E programa no ta un eskoho di maneho di un solo gobièrnu, pero un herensia ireversibel pa futuro generashonnan.

Na nomber di Fundashon Kas Popular (FKP)

Arthur Con, Direktor

30 di sèptèmber 2025