Gerensia di FKP a tuma nota di diferente publikashon i rumor den vários medio i tambe e intrankilidat ku ta reina bou di vários di nos habitantenan, ku ta biba den kasnan di FKP den Otrobanda en partikular esnan den e área di Rif.

Fundashon Kas Popular ke rekonfirmá i enfatisá, ku nunka tabata e intenshon pa saka ningun habitante ku ta kumplí ku su kontrato di hür for di kasnan di FKP den Otrobanda i área di Rif.

Nos ke splika un bia mas, ku e kasnan ku FKP ta buskando un kumpradó pe, ta e monumentunan ku ta pará bashí i esnan den estado di dekadensia. No ta kasnan habitá.

FKP ta lamentá ku ta keda plama informashon ironio, kousando preokupashon innesesario serka nos habitantenan.

FKP ta spera sinseramente ku e informashon korekto aki lo yega serka nos habitantenan konserní i na e pueblo di Kòrsou en general.