Proyekto di 71 apartamentu Montaña Abou awor un realidat.
Djamars dia 15 desèmber durante oranan di atardi Ministernan Sra. Zita Jesus- Leito (VVRP), Sr. Hensley Koeiman (SOAW) i Direktor di FKP Sr. Arthur Con a hasi entrega ofisial di yabi na 24 famia na Montaña Abou. Esaki ta sosodé den kompania di e habitantenan, algun trahadó di FKP i invitadonan, tumando na kuenta e reglanan di distansha sosial.
Di e 71 apartamentu di 3 piso, na e momentunan aki 24 apartamentu ta kla pa wòrdu habitá. Di e 24 apartamentu un kantidat di 14 apartamentu ta di 2 kamber i 10 tin 3 kamber.
E konstrukshon di e proyekto aki tin un invershon di alrededor di nuebe (9) miyon florin.
E bibiendanan aki ta destiná pa hür, kaminada e habitantenan lo paga mensualmente dependiendo di nan entrada entre un mínimo di 100 florin i un máksimo di 400 florin, esaki dependiendo e supsidio di Gobièrnu.
Den e kompleho tin un “beheerder” kual su tarea ta pa vigilá si e reglanan ta wòrdu kumplí i pa fungi komo e punto di kontakto entre habitantenan i FKP.
Pa por a yega na remarke pa un di e bibiendanan aki e kondishon di mas importante tabata ku e grupo di kliente mester a pasa den un proseso di preparashon intensivo di 3 luna.
Den e trayekto di preparashon diferente servisio i organisashon a trata temanan manera higiena, solidaridat, kombibensia, presupuesto, nutrishon, edukashon di yunan, peliger di kandela i seguridat polisial. Organisashonnan i Servisionan ku entre otro a duna un gran aporte dor di duna training tabata, SkuchaMi, Total Cleaning, Brantwer, Kuerpo di Polis, GMN i SOAW. Despues di e trayekto di preparashon e grupo di 24 persona a risibí nan sertifikado kual ta nifiká ku nan ta kla pa habitá e apartamentunan. Meta prinsipal di e kursonan aki ta pa formá i eduká e habitantenan i yuda nan pa krea un mihó kombibensia den e kompleho di 3 piso.
Gerensia di Fundashon Kas Popular ta gradisí tur servisio i organisashon ku a duna nan aporte tantu durante tur e training na e habitantenan komo den realisashon di e proyekto. En partikular Fundashon Kas Popular kier yama un danki na SOAW i VVRP kendenan ta e motor prinsipal den e realisashon di e proyekto aki.
Nos kier felisitá tambe tur e 24 famianan ku awor ta bai biba huntu den un dushi esfera na e kompleho di apartamento na Montaña Abou.
Fundashon Kas Popular lo vigilá pa e tur kos sigui kana bon i mantené un bario bunita i bibabel.